منى عبد الناصر تكشف التقرير السرى للحالة الصحية لأبيها(الجزء الثانى) 05-03-2009

منى عبد الناصر تكشف التقرير السرى للحالة الصحية لأبيها(الجزء الثانى)
05-03-2009



• ابنة الرئيس تواصل حديثها مع عمرو الليثى
• منى عبد الناصر تكشف التقرير السرى للحالة الصحية لأبيها
عبد الناصر أصيب بـ .. السكر بعد فشل الوحدة .. والتهاب فى المفاصل بعد النكسة .. وذبحة صدرية أجبرته على تعيين نائب ولأول مرة صور فرح أشرف مروان ومنى عبد الناصر


فى حوارها الجرئ مع الاعلامى عمرو الليثى تحدثت منى عبد الناصر- ابنة الزعيم الراحل -عن العديد من الاسرار والخفايا التى عايشتها داخل بيت الزعيم .. تحدثت فى العدد السابق عن قصتها مع أشرف مروان واليوم تستكمل القصة …..
-مين اللى احيا الفرح ؟
عبد الحليم حافظ وام كلثوم.. انا كنت بحب عبد الحليم حافظ وام كلثوم كنت بقول لها طنط ثومه.. هى غنت] انت الحب{
المشكله كانت فى فرحى الراقصه.. انا كنت عاوزة زفتين .. وهو مش متصور انه هيمشى فى زفه فى منشيه البكرى .. . قال لى عاوزة ايه؟ متصور هاقول له عاوزة دبابة.. فقلت له عاوزة منشيه البكرى من اولها لاخرها تبقى لمبات ملونه!!! وقعدوا 3 أيام يركبوا لمبات ملونه !!

-الفرح حصل فيه ايه ؟جبتم راقصه ؟
انا قلت له عاوزة زفتين.. قال لى مش كفايه زفه واحده !!وقعدت اتحايل .. بحب سهير زكى ونجوى فؤاد وعاوزة الاتنين ..هدخل بزفه واطلع بزفه.. ودخلت بسهير زكى وروحت بنجوى فؤاد. وبعدين جت ماما قالت لى انا لى طلب.. انا عاوزة اشوف }دكتور الحقنى{ …قلت لة عاوزة دكتور الحقنى فقال لى هيلحقك على ايه الدكتور!!! واتعمل فى فرحى }دكتور الحقنى{

-وأتي ثلاثى اضواء المسرح ؟
وكل الدنيا قاعدة وكان فيه روساء جمهورية وامراء وطلعوا قالوا دكتور الحقنى.. بنته وعاوز يسعدها وطلباتها دكتور الحقنى وزفتين !!

-عامة فى الافراح الاباء يرقصوا ويشجعوا العروسه.. هل شاركك فى اى حاجه ؟
لا لا.. صورى فى الفرح كان قاعد ماسكنى وكل شويه يقول لى: مبسوطه.. اقول له اه

-جاب لكى هديه ايه فى الفرح ؟
دى كانت ماساه ثانيه ودى غرقوا فيها هو والمشير عامر.. قلت له انا عاوزة فى الفرح حلق!! ونا لا انسى تعبير وشه والذهول اللى ظهر عليه ..اد كده انا تافهة!! فراح للمشير عامر وقال له دى عاوزة حلق انا هجيب لها حلق من اين.. فالمشير تطوع وقال له انا هجيب لها وجه قال له مشكلتك اتحلت !!

- تزوجتى.. مين اللى جاب الشقة ؟
الوالد.. البيت اللى احنا فيه ده

-يقال انه إستدان علشان يجيب لكى البيت ؟
نعم.. لما مات كان مسدد بيت هدى وانا ماكنش لسه لان انا جبت بيتى فى فبراير 70

- يعنى معقول عبد الناصر ماكنش معاه فلوس يجيب لابنته بيت ؟
ماهو كان بالتقسيط.. لان عبد الناصر كان بيعتقد انك لو اخدت حاجه مش بتاعتك يبقى قليت مقامك ..هو مات بدرى مات وعمره 52 يعنى هذا البيت عمله بابا بالتقسيط
- ذهبتى على بيت الزوجيه ؟
جيت هنا.. كان بيتى ما خلصش ..انا خلفت جمال وكنت ساكنه فى الجيزة فقال لا تيجى تسكن فى البيت

-عبد الناصر جد لاول حفيد.. لجمال اشرف مروان .. كيف كان جدا لحفيده ؟
كان فيه قبل جمال هاله بنت هدى اختى..هو بيحب الاطفال ولما جه جمال جيت قعدت فى منشية البكرى ولم اروح.. وكنت وقتها فى الجامعه.. كانت ماما تحب الاطفال واستحليت القعده وهنا ماكنش خلصت فقعدت مع ماما

-احفاد عبد الناصر كان بيتعامل معاهم ازاى ؟

كاى جد.. لازم يبقى محضر اللبان والبنبونى علشان لما يجى له ياخد لبان وانا لما كنت ساكنه- الصبح كان لازم يدخل له جمال مع الفطار: اصل الطفل ده حاجه جميله ولما جيت البيت جمال صحى بالليل وقال لى انا عاوز اروح وقعد يعيط
( كان بينام بجواره )

-وقعدتى عند بابا فى البيت ؟
رجعت بعد 9 شهور ..انا خلفت جمال بعد 9 شهور و10 ايام وفضلت قاعده لغاية فبراير سنه 70 وجيت البيت هنا.. وساكن هو فيه معايا .
العلاقة اللى كانت بين بابا واشرف مروان علاقة حميمة جداً .. علاقة واحد ساكن معاه فى البيت.. كان مثلا بيتغدى.. بنفطر.. بيلعب معاه بينج بونج وتنس.. بعد ما بابا تعب سنه 69 كان لازم يمشى ساعه ويمشى على بلاط واتعمل مشاية فى الجنينه- فكان بيجى يتمشى معاه

-فى الفترة دى نقل مروان من المعامل الى مكتب الرئيس ؟
بعد حرب 67 انا كنت فى البيت وكنت لسه والده.. وكنا بننزل المخبا لما تيجى غاره وكلهم تطوعوا.. اشرف كان ضابط فى 67 وكان بيبات فى الاشلاء.. وبعدين بعد الحرب كان فيه مشاكل واشرف بعدها اشتغل مع سامى شرف .

-عشتى مع عبد الناصر الفترة الاخيرة فى حياته ..شفتى النكسه ازاى فى عين عبد الناصر ؟
اوحش حاجه فى الدنيا.. كان تعيس لاقصى درجه ..هو كان معظم الوقت فى المكتب
الم تفكرى تكلميه ؟
اصل هقول له ايه… اللى فكراه لما تنحى

- ايه اللى حصل.. قال لكم انا هتنحى ؟
لا
- ماقلش لماما تحيه انه هيتنحى ؟
لا ما اعرفش قال لماما والا لا.. لكن انا لم اكن اعرف وبعدين الدنيا كلها عرفت ..هو رجع وقال خلاص انا هنزل فى صفوف الشعب وهجاهد زى زيهم بس ماكنش يتنحى ويقعد..كان ناوى يتنحى ويجاهد لاسترجاع سيناء من العدو وكان حلم حياته.. انا اتكلمت معاه بعد كده بعد 9 و 10 يونيو وهو عاش عاوز اعاده بناء الجيش والعبور

-حياته فى البيت تغيرت عن قبل النكسه ؟
طبعا.. اولا حسينا بالمرض اكثر لان هو كان عنده سكر بعد الوحده مع سوريا
- التغير فى شخصيته كان ايه ؟
كان حزين .. لغايه لما جت عمليه ايلات ورفعت من روحه المعنويه.. كان انسان لا يستسلم ..الحاجه الوحيدة اللى تمنعك انك تعافر فى الحياه الموت.. اكيد طول ما انت عايش ممكن تقلب الوضع

-كلمينى عن يوم وفاه المشير عامر.. معروف الحساسية اللى تمت فى النهاية فى علاقة عبد الناصر بعامر وقيل انه قتل ولم ينتحر ..رد فعله ايه يوم ما توفى عبد الحكيم ؟
دى ما اقدرش اتكلم فيها لان دى افكار ناس
حزن على عبد الحكيم جداً طبعا.. انا ما اعرفش غير اللى انا شفته انا صحيت وكنت بحب المشير عامر جداً- صحيت وقراءت فى الجرائد طلعت اجرى على غرفه نومة وقلت له المشير المشير.. كنت بعيط عياط هستيرى.. دخلت وجدته بيعيط .. ما اقدرش اقول قال لى ايه الواحد بيتالم وخلاص.. وكانت لحظه صعبه هقول ايه امام الموت.. مافيش اى طريقة انك تحارب الموت ..

-كلمينى عن علاقة الاب عبد الناصر بمدام تحيه.. يعنى مدام تحيه كانت لاتهوى الاعلام ولا الشهرة او عبد الناصر كان بيحب كده؟ كلمينى عن شخصيه مدام تحيه ولماذا كانت تبعد عن اجهزة الاعلام.. هل هدا كان مقصودا ؟

لا.. اولا هى كانت بتعمل كل المطلوب منها.. اى زوجه رئيس جمهورية كانت بتطلع لها المطار وترافقها..كان بيجى ناس فى البرتوكول تعلمنا وكانوا بيقولوا لها كل حاجه هتعملها بس هو ماكنش فيه تليفزيون.. كان فيه الجريدة ولونظرت للجريدة السينمائية فى مصر هتجد كل شئ بيحتمه عليها البروتوكول كانت بتعمله.. لا ننسى انها كانت فى مرحله يعنى هى خلفت حكيم والوالد كان رئيس جمهورية يعنى ماكنش عندها فراغ.. يمكن مع عدم وجود الاعلام.. كانت تحب القراءه والمزيكا وكانت تعزف سماعى وكان فيه علاقات جميلة فى البيت .. يوم الخميس حفله ام كلثوم كان لازم بابا يسجلها بنفسه وبعدين ينزل تانى يوم المكتب ويرجع على الظهر.. ماما تفضل طول اليوم قاعدة على البيانو تعزف الاغنية ولما يرجع يقول لها ياتحيه اعزفيها لى.. وده كل شئ بيحصل كل شهر.. وكان كل يوم لا يمكن ينزل السلم من غير ما يناديها .. بعد حادث المنشية كانت لازم تقف على السلم وتقراء له قراءن

-هل عبد الناصر كان سى السيد ؟
سى السيد هيقول لها اضربى على البيانو!! كان يحب المزيكا قوى ويحب التصوير جدا وكان يصورها طوال النهار وبعد ما توفى دخلت الدولاب اخذ الصور.. وجدت صور نفسى فزعلت جدا لانى كنت عاوزة صوره هو

-د / هدى اختارت انها تكون سكرتيره لبابا.. انتى ليه لم تفكرى انك تعملى معاه؟
الناس مختلفة.. يعنى انا وهدى نتكلم كل يوم الساعة 9.30 صباحا … اختارها علشان شاطرة ومستعدة تقراء الملفات.. انا مش عاوزة اقرأ الملفات.. انا عاوزة العب رياضة وبحب حاجات اخرى.. اصل لما تخلف 5 مش هتجيب 5 زى بعض.. هى كانت شاطرة ولغاية دلوقتى لما اعوز حاجه اكلمها


- ايه رايك فى الراى اللى بيقول ان د / مروان استفاد من زواجه من منى عبد الناصر ؟

انا استفدت من زواجى منه.. لما تتزوج جوازة وتبقى مش تعيس يبقى استفدت الزواج عائلة وانا كنت كمان ممكن اطلع نكديه..
-انا اتكلم عن الاستفاده الوظيفية وتضخمه وقوته.. هل بسبب زواجه ابنه عبد الناصر ..وطبعا ده يتمناه كل شاب فى مصر ؟
طبعا ثقة السادات فيه كانت ترجع لانه زوج بنت عبد الناصر خصوصا لما فقد الثقه فيه كل من حوله- او هو اعتقد ذلك- وان كان فيه مؤامرة

-البعض يرى أنه اخطا عندما دعم السادات فى 15 مايو 71 ومن المعروف انه قدم الاستقالات الخاصه للسادات وتم اعتقال رجال عبد الناصر ووضعهم فى السجون بعد محاكمات استمرت شهور طويله.. ده مش غريب… يعنى احنا قلنا السادات اختاره لانه زوج بنت عبد الناصر ؟

انا قلت لك انا كنت موجودة لما طلع بابا وقال انا جبت انور وحلف اليمين.. لانى طالع بالطائرة وممكن يصطادوها بالمضاد للطائرات.. واهم حاجه في مصر الاستقرار ..انا كنت واقفه مع الوالده -ودى رساله من ربنا اعطاها لى- ووضعت فى نفس الموقف.. لما وجدت ان هيحصل خلخله فى الاستقرار والعدو على القناة فاشرف كلمنى على الاستقالات فقلت له روح حذره علشان الإستقرار.. راح بسرعة وخلاص مشيت الامور.. بس انا لم يخطر فى بالى دول ولا دول ..اللى خطر فى بالى مصر والاستقرار

-الموضوع ده لم يثير حساسيه بين اخواتك ومروان ؟
أثار حساسيه لفترة ..بس بعد كده عدت ولم تستمر.. انا كنت مقتنعه وخلى بالك الموضوع ده كان فى الاول ( بعد وفاه عبد الناصر ) وهو اللى اختاره..
- اختاره السادات لماذا؟ ..يعنى ليه لم يختار الشافعى او زكريا محى الدين ؟
اكيد كان له نظره.. مش فى الاخر عبرنا.. انا لم اسئله لكن هو لن يختار لمصر حاجه صدفه..

-اقترب مروان من السادات ودامت العلاقة لسنوات طويلة ..؟

بالضبط..لغاية اخر يوم قبل ما يتوفى السادات بثلاثة ايام والناس كانت فاكره ان فية خلافات .. كنا بنمثل ان فيه خلافات وهو ماكنش فيه ..


-إذن لماذا اقصاه من الهيئة العربية للتصنيع ومن رئاسه الجمهورية ؟

ما فكرتش ان جائز يكون ده حمايه له ..
- من مين ؟
ماليش دعوه ( بس حمايه له ) طبعا انا متاكده

-ماذا عن الحملات الصحفيه اللى كانت ضده فى الصحافه المصرية.. الاستاذ / موسى صبرى- وكان معروف انه كاتب السادات الاول- عندما يقول عنه )الطفل المعجزة( ايضا حمايه ؟

شوف.. الحياه دى يبقى فيها صراعات وناس فاهمه صح وناس فاهمه غلط.. وناس شايفه اللى على الوش وناس شايفه المستخبى.. لما تجيب الجرايد كلها هتجد فيها اسماء لسه خارجه من قضيه.. كتبوا كتاب ان ده خلاص اتغضب عليه وهم جائز كانوا زعلانين منه.. فشايفين ان خلاص اتغضب عليه.. هو لم يتغضب عليه ولو نرجع للجرائد هنجد فى حادث معين (مش هسميه) ان حد اتكلم وشتمه فى كتبه.. انا رحت فى بيت السادات وكنت زعلانه.. الاخر اتي السادات بالثلاث جرائد: اهرام واخبار وجمهورية قال خلاص اعطوه الصفحه الاولى يرد فيها واعطوه الصفحه الاولى رد فيها.. هل فيه حد مغضوب عليه يرد فى الصفحه الاولى فى الثلاث جرائد ؟
هو كان طفل معجزة ..حاجه تغيظ انك واحد عمرك 27 سنه وطالع كده.. لو انا وكيل وزارة هتغاظ..
-اذاً العمليه كانت تمثيلية لحمايه اشرف مروان ؟

طبعا ..
-من مين ؟
منك ومن اسئلتك !!!

-قلتى لى العلاقة استمرت قبل وفاه السادات بثلاثة ايام ؟

نعم ..ثلاثه ايام كنا عنده واتعشينا عنده فوق فى غرفه النوم ..
-يعنى معه ومع مدام جيهان رغم ما نشر فى الصحافه المصرية وما قيل ان فيه خلاف بينه وبين مدام جيهان ؟
هو حد عارف فيه ايه داخل البيت.. قعدنا اتعشينا وكده وكان يوم ا أكتوبر وكنا مسافرين نعيش بره واغتيل يوم 6 أكتوبر ..


-اصعب لحظه شوفتيها فى حياتك ..متى ؟

لحظة وفاة والدى ..وفاة امى ووفاة اشرف




اذاً كان اصعب لحظه 28 سبتمبر 1970.. كان هذا اليوم يوم وفاه الرئيس عبد الناصر ….اخر يوم فى حياة عبد الناصر

-متى اصيب عبد الناصر بالسكر ؟

بعد الوحده 58

-بعد الوحده ام بعد فشل الوحده ؟
بعد الوحده.. مش بعد الفشل ..هو كان عنده استعداد لان يكون عنده سكر لان اخوه كان عنده سكر ..كان بيشتغل كتير قوى وده كان شغلة زياده.. وبلدين وافكار مختلفة ..كان الاول فية حماس وبعدين تدخل تجد الحقيقة المره ..فكان بيشتغل كتير جدا ومسئوليته كبيره ..

-ما تاثير فشل الوحده على زيادة السكر ؟

هو عاش طول عمره انا اشوف الصبح يجى الدكتور علشان يعطيه حقنه الانسولين.. قالوا لنا ان بابا عيان.. ماما كانت تقول لنا ماحدش يقول خالص.. لان لازم رئيس الجمهورية يبقى عفى علشان العدو لا يستغل مرضه وكان الموضوع مستخبى خالص.. انه مريض بالسكر..او اى مرض حتى الانفلونزا يقولوا لا ماتقولوش..

-من الدكتور اللى تم تكليفه لعلاج عبد الناصر بعد اصابته بالسكر ؟

كان فيه الدكتور ثروت وبعدين كبر وبعدين الدكتور الصاوى حبيب كان بيجى كل يوم يقيس الضغط ويشوف السكر

- هل كان معه دكتور مرافق ؟

اه.. دكتور ثروت كان بيجى له الصبح وبعد الظهر يقيس السكر لان كانوا يقيسوه بطرق بدائيه مش زى دلوقتى

-هل كان بيصطحب الدكتور معاه فى اى زيارة ؟

طبعا لازم.. بل عكس كان فيه كمان سيارة اسعاف

-هل سيارة الاسعاف فى الركاب بعد مرضه بالسكر ولا قبل كده ؟

لا دى من ضمن النظام لان ممكن يغتال.. ده نظام لازم لاى رئيس الجمهورية يمشى بسيارة اسعاف

-كيف اثرت النكسه على الحاله الصحيه لعبد الناصر ؟

اصيب بالاتهاب فى الاعصاب .. ده بيجى من الانفعال الشديد وكان بيبقى وجع فى الارجل او الظهر جاء له فى الرجلين والظهر ..كانت الالام لا تطاق ومع ذلك كان يتحمل الالام دى وبعدين قالوا له فى اسخالطوبو(روسيا) فيه علاج لالتهاب الاعصاب .. راح وعمل وارتاح ومازالت مصحه اسخالطوبو بتعالج التهاب الاعصاب ..

-يعنى اذنً حاله التهاب الاعصاب زادت بعد ذلك ؟

اه ..بتيجى من الانفعال والتوتر
-ماهى طريقه العلاج التى كان يتم اتباعها فى موسكو ..هل كانت فعاله ؟

بالنسبه لالتهاب الاعصاب اتحسن.. بس دى حالات بتيجى وتروح مع الانفعال مش يبقى الواحد قاعد متوجع 24 ساعه وهو راح اسخالطوبو وهمه متقدمين فى الطب بس مش زى الامريكان ..

- هل علاقته السيئة بالامريكان احالت دون ان يكون هناك الاستشفاء الاكبر ؟

نعم..احالت علاقتة السيئة بالغرب.. هو كان حلم حياته انه يروح باريس كان قد قرأ (عصفورمن الشرق) لتوفيق الحكيم.. فكان بيحلم انه يروح باريس وكان يقول لماما:بعد ما اخلص رسالتى اسلم البلد واخدك واروح باريس.. فحلم حياته انه يروح باريس

- ايه رايك فى المقوله اللى تقول ان عبد الناصر مات بعد 67 ؟

بعد نكسه 67.. هو علمنى ان الموت بيجى مع الموت.. لكن طالما فيك نفس لازم تجاهد تقلب الاوضاع.. هو متى بطل يجاهد؟ لما راح النفس

- هل فكر فى الاستقاله لسوء حالته الصحيه ؟

هو فكر فى الاستقاله لانه حس ان دى مسئوليه وان القائد المهزوم لازم يستقيل.. لكن لاسباب صحيه لم يفكر.. بالعكس ده بعد ايلات وحرب الاستنزاف حس انه هو هيفضل لاخر نفس يجاهد لغايه مايعبر.. كانت امنيه حياته العبور..

- ما هى اهم الاحداث التى اثرت صحيا على عبد الناصر ؟

هزيمة 67 والشغل الذى ليس له اول ولا اخر فجينا سنه 69 وكانت اول ذبحه صدريه

-كان فين ساعتها ؟
فى البيت.. افتكروا عنده انفلونزا.. طبعا خبوا علينا لان دى حاجه فيها خطوره على مصر.. ان تعرف ان عبد الناصر عنده ذبحه… فقالوا لماما لا تقول ..وجدناهم بعد كده يبنوا مصعد فى البيت واللى عنده القلب ده زمان يرتاح ويقولوا لة لاتطلع سلم ..فركبوا مصعد ..
بعد كده قالوا له لازم تريح نفسك 15 يوم بدون انفعال.. فقعد زائد انه بطل السجاير ( هو كان شرة فى التدخين ) بس كان عنده قدره.. قالوا له لازم تبطل السجائرفلم ياخذ ولا نفس بعد كده لغايه ما مات.. وقال لو هى دى هتعوقنى انى احارب مش هاخدها..

- حين بدأ يشعر ان عنده ذبحه.. هل كان هذا دافعا لان يفكر فى تعيين نائب رئيس الجمهورية ؟

هو طول عمره عنده اربع نواب

- لكن فى الاخر اختار السادات على اعتبار انه الرئيس القادم ؟

ماحدش بيفتكر انه هيموت عمره 52 سنه

هل لم يفكر ان يسافر بره ؟
فى التاريخ ده لم تكن موجوده عمليات تغيير الشرايين لاهنا ولا فى امريكا ولا فى اى مكان

عندما عرف باصابته بازمة قلبيه لماذا لم يستجب لنصائح الاطباء بتقنين العمل ؟

استجاب على قده.. كان قاعد وماكنش بيخرج بس ما تقدرش.. يعنى انا كنت معاه فى غرفه النوم لما تم تبليغه بعمليه سرقه الردار ماهم لازم يكلموه..وبدأ يتكلم ويشتغل حتى وهو فى السرير

-عبد الناصر كان يعالج فى الاتحاد السوفيتى.. قيل ان السوفيت كانوا ضالعين فى وفاه عبد الناصر.. تعقيبك ؟
لا تعقيب .. بالنسبه للمرض بتاع الوالد وحالته الصحيه.. بالنسبه للسكر و المجهود اللى كان بيعمله وبالنسبه لإصابته بالذبحه إضافه الي التقدم علمى المحدود وقتها..

-من من الدكاتره اللذين اضيفوا لقائمه اطباء السكر بعد اصابته باول ازمه قلبية ؟

في د / منصور فايز وكان بيجى له دكتور من اسكندريه اسمه دكتور صلاح الدين وبلغوه

-كيف اثرت حرب الاستنزاف على تدهور الحاله الصحيه لعبد الناصر ؟
طبعا كان بيزعل.. انا قاعده معاه فى الجنينه وبلغوه وقت بحر البقر.. دى من المرات اللى بكى فيها ..الكلمه اللى قالها: همه بيحاربوا بالزراير واحنا مش عارفين حتى ناخد الميج 21.. فعلشان كده الواحد لما تشوفه يبكى وامنية حياتة ان السلاح بتاعه يبقى فى مستوى سلاح العدو ممكن تعمل اى حاجه ..
-كيف تلقى نبا استشهاد عبد المنعم رياض ؟
زعل جداً ..كان تعيس.. وبعدين تخيل انك انت فقدت واحد ذو خبره.. يعنى طبعا الحياه بعد 67 مش سهله وبناء من اول وجديد.. لكن كان عنده امل انه يوم من الايام هيعبر ..